سەرۆکی پەرلەمان: ئەم قۆناغەی ئێستامان پێویستی بە گفتوگۆی زیاترە.

22/04/2015 02:53:00 م
لەسەردانی دەستەی سەرۆکایەتی پەرلەمانی کوردستان بۆ مەکتەبی سیاسی پارتی دیموکراتی کوردستان، کە نیوەڕۆی ئەمڕۆ چوار شەممە ٢٢ی نیسان ڕێکخرا. د. یوسف محەمەد سادق سەرۆکی پەرلەمانی کوردستان، باسی لە پرسی دەستووری هەرێمی کوردستان و یاسای سەرۆکایەتی هەرێمی کوردستان و گفتوگۆی فراکسیۆنەکانی پەرلەمان لەسەر سازانی نیشتمانی کرد، سەرۆکی پەرلەمان، ئاماژەی بەوەدا ئەم قۆناغەی ئێستای هەرێمی کوردستان پێویستی بە گفتوگۆی زیاترە، سەردانی دەستەی سەرۆکایەتی پەرلەمانی کوردستایش بۆ لای پارت و لایەنە سیاسییەکانی کوردستان لەو سۆنگەیەوە سەرچاوەی گرتووە.
لە دانیشتنەکەشدا. شاندی مەکتەبی سیاسی پارتی دیموکراتی کوردستان، بەسەرۆکایەتی فازیل میرانی سکرتێری مەکتەبی سیاسی و ژمارەیەک لە ئەندامانی مەکتەبی سیاسی ئەو حیزبە بوو.
سەرۆکی پەرلەمانی کوردستان، باسی لەم قۆناغە و کارکردنی پێکەوەیی فراکسیۆنەکانی پەرلەمانی کوردستان کرد، بۆ گفتوگۆکردن لەسەر گەیشتن بە ڕێگەچارەیەکی یاسایی و سازانی نشتیمانی.
فازیل میرانی، بەناوی مەکتەبی سیاسی پارتی دیموکراتی کوردستانەوە، بەخێرهاتنی دەستەی سەرۆکایەتی پەرلەمانی کوردستانی کرد و ئاماژەی بەوەدا ئەم سەردانانە ئامانجی خۆی دەبێت و کاریگەریی لەسەر ئەدای فراکسیۆنە جیاوازەکانی پەرلەمان دەبێت، پشتیوانی پارتی بۆ هەنگاوەکانی پەرلەمان و پرسی سازانی نیشتمانی لەسەر دەستوور دوپاتکردەوە.
 

رۆژمێرى رووداوه‌كان