پەیامی جێگری سەرۆكی پەرلەمانی كوردستان لە ساڵیادی ڕێككەوتننامەی 11 ی ئادار و ڕاپەڕینە جەماوەرییەكەی شاری هەولێر

11/03/2017 05:56:00 ص

لە ساڵیادی ڕاگەیاندنی "ڕێككەوتننامەی 11 ی ئادار" دا، سڵاو و بیرۆزبایی خۆمان ئاراستەی گەلی كوردستان بەگشتی و خانەوادەو كەسوكاری شەهیدان و ئەنفالكراوەكان و پێشمەرگە قارەمانەكانی كوردستان بەتایبەتی، دەكەین.

   ڕێككەوتننامەی 11 ی ئاداری 1970 ، بەرهەمی خەباتی گەلی كوردستان و خوێنی هەزاران شەهید و فیداكاری پێشمەرگە دلێرەكانی میللەتەكەمان بوو. بەدەستهێنانی ئەم دەستكەوتە مێژووییەی، هەنگاوێكی سیاسیی بوێرانەی شۆڕشی مەزنی ئەیلوول بوو، بە سەركردایەتی بارزانی نەمر. ئەو شۆڕشەی  كە رژێمی ئەوسای بەغدا ناچاركرد ملكەچی ئیڕادەی گەلی كوردستان بێت و بۆ یەكەمجار دان بە مافە ڕەوایەكانی سیاسی و نەتەوەیی و ئیداری وكەلتووریی ئەم گەلە بنێت.

   هاوكات، ئەمڕۆ یادی " 26 " ساڵەی ڕاپەڕینە جەماوەرییەكەی شاری هەولێری خۆشەویستە دەكەینەوە، كە لە رۆژی 11 ی ئاداری 1991 دا و شانبەشانی پێشمەرگە قارەمانەكانی كوردستان و بە یەك ئاراستە و یەك دەنگ شارەكەیان لە دامودەزگا داپڵۆسێنەرەكانی رژێمی بەعس پاككردەوەو  ئەو راستییەیان سەلماند كە هیج هێزێك ناتوانێت ڕێگری لە ئیڕادەو خواستی ئازادیی خەڵكی كوردستان بكات.

   دوابەدوای راپەرینیش و لە ساڵی 1992 دا، جەماوەری كوردستان، لە ئاهەنگێكی دیموكراسییدا، بەئاراستەی سندووقەكانی دەنگدان چوون بۆ هەڵبژاردنی نوێنەرەكانیان لە پەرلەمانی كوردستان، كە سیستەمی فیدڕاڵی لە چوارچێوەی دەوڵەتی عیراقدا رایگەیاند، بە پشتبەستن بە دەستكەوتەكانی ئەم میللەتە و بنەمایەكانی رێككەوتننامەی 11 ی ئادار.  .

   ئەمڕۆش، عێراق و ناوچەكە بەگشتی گۆڕانكاریی سیاسیی گەورە بە خۆوەوە دەبینێت و جەنگی دژی تیرۆریستانی داعش بەرەو كۆتایی دەڕوات. ئەمەش وا پێویست دەكات میللەتەكان سوود لە هەموو وەرچەرخانەكان وەربگرێت و بە یەكڕیزی و یەك گوتار و بە وشیارییەوە بەرەنگاری پیلانەكانی ناحەزان ببێتەوە و لە ئاست ئەو پێشهاتانەدابێت و ئامانجەكانی شۆڕش و ڕاپەرینەكانی بكاتە هەوێنی كاركردن لە پێناو بەدیهێنانی هیوا و ئاواتەكەی لە دەوڵەتێكی سەربخۆدا و دابینكرنی ژیانێكی شایستەو بەختەوەر.

    بەرز و پیرۆزبێت ساڵیادی رێككەوتننامەی 11 ی ئادار و ڕزگاركردنی شاری هەولێر، پایتەختی هەرێمی كوردستان، و سەری رێزو نەوازش بۆ گیانی پاكی شەهیدانی ڕێگای سەروەری كوردستان دادەنوێنین.

 

دكتۆر جەعفەر ئیبراهیم ئێمینكی

جێگری سەرۆكی پەرلەمانی كوردستان

11/3/2017


رۆژمێرى رووداوه‌كان

په‌خشى راسته‌خۆ