جێگری سەرۆكی پەرلەمان پێشوازیی لە شاندێكی یەكێتی مامۆستایانی كوردستان دەكات

03/10/2017 04:25:00 م

بەبۆنەی دەستپێكردنەوەی وەرزی نوێی خوێندن لە هەرێمی كوردستان، ئەمڕۆ سێشەممە 3/10/2017 دكتۆر جەعفەر ئیبراهیم ئێمینكی جێگری سەرۆكی پەرلەمانی كوردستان پێشوازیی لە شاندێكی یەكێتی مامۆستایانی كوردستان كرد .

لە دانیشتنێكدا، بە ئامادەبوونی خاتوو بێگەرد تاڵەبانی سكرتێری پەرلەمان و ژمارەیەك لە ئەندامانی پەرلەمان، جێگری سەرۆكی پەرلەمان پیرۆزبایی لە مامۆستایان و قوتابیان كرد بەبۆنەی دەستپێكردنەوەی وەرزی نوێی خوێندن و رۆڵی مامۆستایانی كوردستان لە خۆراگری و بەرەوپێشبردنی سێكتەری خوێندن و پەروەردە بەرز نرخاند و رایگەیاند: رۆڵی هەموومان تەواوكەری یەكترە بەڵام رۆڵی مامۆستایان رۆڵێكی زۆر گاریگەرە لە كۆمەڵگەدا و دەبێت قوربانی و ماندووبوونی مامۆستا هەمیشە لەبەر چاو بگیرێت. لە لایەن خۆشیەوە خاتوو بێگەرد تاڵەبانی سكرتێری پەرلەمان ئاماژەی بە رۆڵی پیرۆزی مامۆستایان كرد و وتی : هەموومان پەروەردەی دەستی ئێوەین و خۆمان بە قەرداری ئێوە دەزانین و ئاوەردان بە دۆخ و گوزەرانی ئێوە ئەركی پەرلەمان و حكوومەتی هەرێمە.

هەر لە دانیشتنەكەدا باسی سیستەمی مووچە كراو لەم بارەیەوە مامۆستایان چەند پێشنیار و بۆچوونیان خستەڕوو و جێگری سەرۆكی پەرلەمان ئاماژە بە هەوڵەكانی ئەم دوواییەی سەرۆكایەتی پەرلەمان و لیژنەكانی پەیوەندیدار كرد بۆ چارەسەركردنی كێشەی مووچە و رایگەیاند: ئەم هەوڵانە لەگەڵ حكوومەت بەردەوامن بۆ ئەوەی بە زووترین كات و بە باشترین میكانیزم ئەم كێشەیە چارەسەر بكرێت.  


رۆژمێرى رووداوه‌كان