بەئامادەبوونی سەرۆکی پەرلەمان یەکەمین کۆنفڕانسی گفتوگۆی شارستانی بەڕێوەچوو

10/04/2019 12:46:00 م
سەعات ۱۰ی سەرلەبەیانیی ئەمڕۆ ۱۰/٤/۲۰۱۹، بەئامادەبوونی د.ڤالا فرید ئیبراهیم، سەرۆکی پەرلەمانی کوردستان و مونا نبی قه‌هوەچی، سکرتێری پەرلەمان و ئومێد خۆشناو سەرۆکی فڕاکسیۆنی پارتی دیموکراتی کوردستان و ژمارەیەک لە پەرلەمانتاران، یەکەمین کۆنفڕانسی گفتوگۆی شارستانی کەلەلایەن ڕێکخراوی ئیست ڕێکخرابوو لە هۆتێل شیراتۆن له‌ هەولێر بەڕێوەچوو. 
لە کۆنفڕانسەکەدا کەنوێنەری پارێزگای هەولێرو میوانانی دەرەوەی وڵات ئامادەیبوون، د.ڤالا فرید ئیبراهیم، سەرۆکی پەرلەمانی کوردستان وتارێکی پێشکەش بەئامادبووان کرد. 
لەوتارەکەیدا سەرۆکی پەرلەمان وێڕای بەخێرهێنانی میوانانی کۆنفڕانسەکە ڕایگەیاند: "پێکەوەژیانی ئاشتییانە لەکۆمەڵگەدا لەسەر بنەمای دانپیانان بەیەکتری دروست دەبێت، بەوەی کەسی بەرانبەر مافی بوونی هەیەو مافی ئەوەشی هەیە کەجیاواز بێت لەڕووی نەتەوەو ئاین و زمان و ڕەگەزەوە، کە ئەم جیاوازییانە بنچینەی ژیانی مرۆڤایەتی دروست دەکەن" 
 
 
هه‌روه‌ها باسی لە هەردوو پرەنسیپی ئازادی و دادپەروەری کردو بەدوو کۆڵەگەی گرنگی پێکەوەژیانی وەسفکردو جەختی کردەوە لەوەی دادپەروەری بەدابینکردنی هەلی یەکسان لەنێوان تاکەکان بەرجەستە دەبێت و ئازادیش بە دەستوور و یاسا گشتییەکان زەمانەتکردنی ئەو ئازادییە بۆ تاکەکان بەرجەستە دەبێت، سەرۆکی پەرلەمان ئەوەشی خستەڕوو کەئەگەر بەبیرۆکەی پێکەوەژیانی ئاشتییانە لەهەرێمی کوردستاندا بچینەوە دەبینین پرەنسیپی دادپەروەری و ئازادی کەکۆڵەگەی پێکەوەژیانن لەسەر ئاستی واقیعی و یاسایی ڕەنگیانداوەتەوە بەجۆرێک کە پێکهاتەی نەتەوەیی و ئاینیی جیاواز لەم هەرێمەدا بوونیان هەیەو بەشێوەیەکی ئاشتییانە ژیان دەگوزەرێنن و ئامادەن لەپێناو پاراستنی هەرێمی کوردستان قوربانی بدەن. 
پاشان سەرۆکی پەرلەمانی کوردستان باسی لە ڕۆڵی پەرلەمانی کوردستان کرد لە سەرەتای دامەزراندنییەو ڕایگەیاند: "پەرلەمانی کوردستان ڕۆڵێکی گرنگی هەبووە لە بەرجەستەکردنی بیرۆکەی پێکەوەژیانی ئاشتییانە لەو یاساو بڕیارانەی کە پەسەندی کردوون و پەیوەستبوون بەفەراهەمکردن و پارێزگاریکردن لەمافی پێکهاتەکان لەهەرێمی کوردستان، کە گرنگترینیان یاسای ژمارە (۱)ی ساڵی ۱۹۹۲ی هەڵبژاردنی پەرلەمانی کوردستانە، کە لەڕێی سیستمی کۆتا مافی پێکهاتەکانی لەنێو پەرلەمانی کوردستاندا مسۆگه‌ر کردووە، هەروەها یاسای ژمارە(٥)ی ساڵی ۲۰۱٥ کەمافی پێکهاتەکانی لەدەسەڵاتی ڕاپەڕاندن و سەرجەم دامودەزگاکانی هەرێمی کوردستان مسۆگه‌ر کردووە. 
لە کۆتایی وتارەکەیدا د.ڤالا فه‌رید، سەرۆکی پەرلەمانی کوردستان بەناوی ئەندامانی خولی پێنجەمی پەرلەمان دەستخۆشیی بەستنی کۆنفڕانسەکەی کردو هیوای سەرکەوتنی بۆ خواستن.

رۆژمێرى رووداوه‌كان

>